【独家】离开效力8年TVB想自己话事 45岁虾头择偶要有须似陈豪

杨诗敏（虾头）喺TVB剧集《爱美丽狂想曲》好抢戏，剧中饰演Kiki有唔少男伴，又带埋李佳芯等人去喂「鸭」纵欲！由于同现实中保守性格好唔同，虾头话过足戏瘾，笑言多谢监制赏赐，惟一可惜系Man爆嘅陈豪同李佳芯一对！45岁未有拖拍嘅虾头期望搵到个细心又有型嘅「翻版陈豪」做男友。采访：方骞平 发型：Ivan Lee @ Headquarters 场地：abc> Studio

虾头喺剧中嘅角色大胆出位，由于与Baby Baby（Patrick Sir）迟迟都未能突破超友谊关系，搞到欲火焚身，酒后乱性同相识多年嘅好友苏泽基（曹永廉）搞埋，唔止戏份重，演得相当有「火花」！

一讲男人就兴奋
虾头好满足：「做呢啲角色好正呀，好feel free！但其实我本身好文静、好斯文，对感情好专一，只能爱一个，仲系听晒男友话嘅屈就家嫂型，不过被上次经历(同前度经理人邵子风)有所启发，咁样系好唔健康嘅做法，要共同成长，互相欣赏先可以长久。」虾头表示学懂爱锡及做好自己，「咁样自然会吸引到一啲识得欣赏我嘅人，我都吸引到小猫3、4只㗎！」虾头愈讲愈兴奋，佢话自己最like留须，陈豪嗰类型嘅男人，「真系佬味十足，陈豪都知我系佢铁粉，对住佢心心眼，我哋坐埋会研究演技，哎呀！应该叫佢介绍型男畀我识啦！」

对被TVB重用为何仍坚持离开？虾头坦言疫情下停工，促使她要主动出击，趁有气力成立工作团队做老板，加入独有嘅幽默感或音乐、演戏元素拍网上短片或舞台剧，甚至创出新模式呈现畀观众睇：「我好似傻妹咁要闯七关，好相信傻人会有傻福。」