【維港會】天文台「見字飲水」復活漫畫獲逾千讚好 市民：我想要個水樽
2021-04-04 14:22 
天文台的社交網站專頁向來多搞作，天文台今日在facebook祝大家復活節快樂，又提醒「一股清勁至強風程度嘅偏東氣流影響廣東沿岸，今日同嚟緊幾日會冇之前咁熱啦，不過大家喺戶外依然要記得補充水分呀」。
天文台更附上一套漫畫，見到雨點BB奄奄一息，在度天隊長手上呼救「好...熱...我要蒸發啦」，度天隊長說「吓你講咩呀雨點BB？大聲少少」雨點BB於是有氣沒力的不斷說要水，更要「見字飲水」，此時「特派專員」東風到，還說「唔使驚」，背後的雨點BB目瞪口呆，畫外音更鬼馬地說「你嘅演員的自我修為呢雨點」。
清風姐姐隨身拿出一個水樽叫雨點BB「飲啖水先啦」，這時雨點BB才「呀」一聲「一秒入戲」，「咕碌咕碌」地飲水，雨點BB隨後煞有介事地說「原來...水都可以咁好飲」，雨點BB搖身一變「加埋啲東風我『復活』啦」，還贈上一句「唔使下年清明嚟搵我啦」。
專頁最後說，「天氣家族話要拍套短劇應吓節」。漫畫吸引過千名網民讚好，指大有創意，「雨點BB好得意！一秒入戲笑咗」、「唔使下年清明嚟搵我啦真係好正...」、「整個制作生動有趣，令看者易明!」、「啲表情真係好正！」、「復活清明兒童節快樂」。
有市民更提出「我想要個水樽」、「隊長會唔會岀公仔？」、「畫得好有心，對白又搞笑，水樽好靚，遲下係咪會出周邊呀」，不知天文台會否順應民意推出周邊商品。
最新回應