【維港會】僱主新年陪入院做手術 外傭家人寫信致謝

新年有不少禁忌，不少人會避免出入醫院，但有僱主與外傭就情同家人，在新年期間陪伴外傭入院做手術，令外傭非常感動，其家人更寫信向僱主致謝。

有網民近日在Facebook群組「外傭僱主必看新聞訊息」分享指，年三十晚收到醫院通知，外傭姐姐原本明年的手術，因有病人取消，姐姐可提早初五做手術。但由於親人不在身邊，姐姐感到憂心，樓主就決定親自在年三十晚陪姐姐到醫院做手術前檢查，又不斷陪伴開解她。

樓主表示，不介意姐姐新年期間去做手術，「佢不斷同我哋講好開心有我哋做佢僱主，我亦同佢講其實係我哋好好彩請到佢做姐姐，令我兩公婆可以安心返工搵錢，多謝佢照顧好我家大小長老。」事後，樓主更收到外傭家人的親筆信，「有時你對工人好佢會感受到，佢家人都會感受到，我知道人無完美，但共處一室我就當佢係自己家人一樣！」。

不少網民都留言讚好人有好報，「睇到我眼濕濕」、「樓主係值得有個好工人」，也希望外傭快些康復。