【有火藥味 】接受陳定幫訪問鬧爆老公 吳若希大除夕揚言：之後玩返你50年

有份參與TVB賀歲節目《天天開運王》玄學家陳定幫(Clement)最近喺youtube開咗個講吓風水玄學頻道，日前請咗娛樂圈「最惹火夫妻」吳若希(Jinny)同老公何兆鴻（Alex）一齊做訪問，兩公婆結婚3年多，育有女兒Giselle和兒子Kylian，但不時嘈嘈吵吵，節目中Jinny繼續質問老公，好有火藥味，連幫幫師傅都滴晒汗，Jinny又大爆兩公婆閨房秘密。

 

投訴錯失澳門派錢福利

節目一開始，兩人即有火花，澳門人Alex自爆經已攞咗香港身份證，但吳若希講起就嬲：「婚都結埋，我喺澳門住咗咁耐，唔知點解佢唔幫我申請澳門身份證？所以每年我都錯過咗澳門派錢呢個福利。」何兆鴻尷尬解釋：「主要比較忙…忙住陪老婆生產。」吳若希不客氣反駁：「你行開啦你，我生產完喇！」

騎呢人配騎呢命格最夾

原來兩人認識由陳定幫做媒，當日兩人在evevt認識，Alex表示想睇陳定幫，由Jinny安排，之後陳定幫推介Jinny話：「呢男仔得，同你夾喎，而且好就你，畀你搓完壓扁，尤其女人，要搵好錫自己嘅男人會幸福啲。」陳定幫補充話，有啲人有特別感情命格，所謂騎呢人要配騎呢命格，好似兩條蛇纏埋一齊就分唔開，Jinny啱搵個外地人，或年紀有距離。雖然「巨門化忌」夫妻宮會吵架吵到七彩，但互寸可以化解。何兆鴻忍唔住爆句：「我冇寸過佢，係被寸！」陳定幫即打圓場：「夫妻有幽默感好啲！」Alex繼續好不滿話：「佢(吳若希)冇幽默感，一嚟就乸埋塊面。」

 

懷恨老公婚前周圍送花

講到情人節，吳若希話每年老公要送花，但又想當年，令她嬲到震，火爆地再數老公：「當年佢追我時身在澳門，但同時間送咗99枝玫瑰畀第二個女仔，而佢又透過香港朋友送18支藍玫瑰畀我，99枝同18枝對比，你話我有乜感覺呀？許廷鏗仲好刻薄話，『佢買咗99 枝花，係咪送咗18枝畀人，其他唔知送畀邊個，所以送畀你呀？』雖然好好笑，但我愈諗愈嬲！𠵱家都想爆粗！你解釋吓點解咁做，係咪錢多呀？」Alex面紅紅說：「唔係，漁翁撒網係每個男人未結婚前做嘅嘢…」吳若希即提高聲調指罵老公：「我想講，想玩感情，唔好對住一個認真嘅人玩，玩完之後，如果唔離婚，我希望之後玩你50年！」搞到坐中間的陳定幫不知所措說：「我都唔知講乜…滴汗！」吳若希再說：「我又有嘢講，有次我大肚時佢幫我剥蝦，我不停Keep住張嘴話蝦蝦蝦…突然佢好躁底話『等吓啦！應份㗎！』但有晚我哋同幫幫及Bob一家飯聚，佢反而主動同幫幫師傅剥蝦殼！」Alex解釋：「因為我當時剝咗好多隻，佢不停『蝦蝦蝦』，我又要快剥，個女又食緊飯，有碗飯又未食，所以躁咗，事後我有道歉。」

和諧夫妻牀單被鋪一致

吳若希經常係IG數老公不是，幫幫師傅問Alex會否嬲？Alex坦言：「睇到嗰刻梗係感覺唔係咁良好啦！」吳若希反問：「我爆你啲嘢前，你有冇諗過你做錯嘢先？」Alex死晒狗話有：「所以我冇嬲過你，我經已去到我唔睇地步，係朋友轉畀我，尤其老婆幫我生第2個，記性特別差，等我慢慢行開，或者慢慢畀佢趕走一陣，佢瞓醒就冇事，唔出聲係最好表達。」陳定幫提醒夫婦們，牀單被鋪要一致，感情會較和諧，最重要牀頭板唔好有鎅開紋，否則代表有裂痕。

 

大爆閨房磨腳捽頸秘密

吳若希又不滿瞓覺時老公會背向她撳電話，唔太理她：「我反而會向住佢，然後伸腳去磨佢腳腳，佢唔畀我磨，我會好躁底，瞓唔著！」何兆鴻帶點不滿說：「我第日要返工，要搵最快瞓覺方法，佢磨腳又捽我手臂同頸，搞足粒幾鐘都，佢先瞓得著，我好痛苦。」