疫情下深入泰國拍新常態胡慧冲網上頻道獲熱捧超過十萬人訂閱

2020-12-31 02:34

「泰國通」胡慧冲疫情下冒險周圍去拍片，提供到有咁多最新資訊，網上頻道超過十萬人訂閱。

泰國疫情喺12月反彈，昨日單日確診急增250宗，除夕慶祝活動被迫取消，泰國人只能留家，透過電腦、手機等睇放煙花。疫情肆虐期間，「泰國通」胡慧冲(Roger)依然無間斷周圍去拍嘢，發放當地最新資訊及新常態。昨晚由洪永城主持嘅TVB節目《再見2020你還好嗎》泰國篇，Roger深入當地嘅航空公司、國際五星級大酒店、商場及超級市場等探討疫情下求生方法。

其中Roger到訪當地嘅航空公司總部員工餐廳，享受經濟客艙飛機餐，他表示，疫情下航空公司總部員工餐廳開放畀街外人光顧，仲將餐廳變身機艙，提供飛機餐，並且由真實空姐嚟做侍應，更有機師喺工餘時間表演音樂助慶。另一間大型超市，員工被訓練成舞蹈員，大跳家燕姐十字步娛賓，帶出正能量，而一間國際五星級大酒店則推出抵食抵玩優惠套票。

Roger坦言疫情下收入大受影響：「早幾個月仲有啲廣告拍吓，可惜上個月開始零收入，要動用到手頭嘅積蓄，但我賤命，唔坐得定，仍然好落力拍片放喺youTube頻道，畀多啲資訊大家，同時keep返啲人氣。𠵱家我個youTube頻道超過十萬人訂閱，打算明年設會員制，鼓勵自己愈做愈好。」講到新年願望，他希望全球能趕走疫情，經濟回復好轉，他可以回港探望父母，計落足足有一年沒有見過雙親。