缺席《新城》頒獎禮強調屋企有事陳卓賢認愛盧慧敏否認掛住拍拖

2020-12-31 14:41

MIRROR的27歲成員陳卓賢（Ian）兩星期前被爆和新劇《無限斜棟有限公司》的女主角盧慧敏（Amy）撻著，昨日更被拍得拖手拍拖遊坪洲，因新城頒獎禮亦於昨日舉行，缺席的他被指戀愛大過天，連工作也不出席。

一直沒有公開回應緋聞的Ian，凌晨在社交網站貼黑圖並發文說：「私事一向都不回應，因為想大家關注係我工作、作品。但今次涉及我工作態度，我想自己回應一下。多謝大家關心，睇到報章話我聲稱自己拍劇唔去頒獎禮而係去拍拖，想講少少。首先，劇集嘅拍攝一早已經完成，而我請假係早係一個月前請左（咗），原因係屋企人有事，處理該事嘅時間係同頒獎禮相撞，對外講話係因工作未能出席，係覺得關乎我屋企人嘅事無必要公開講太多。我嘅工作態度一直無變，仍然係想做好每一個作品比大家聽，比大家睇。祝大家新年快樂！」

因為Ian於文中只澄清工作態度，並沒否認與Amy拍拖一事，記者亦發現二人的社交平台未有互相關注。記者就此事聯絡MIRROR經理人花姐，她以短訊替Ian認愛：「Amy同Ian係拍緊拖，新城頒獎禮1400-1600，因撞左（咗）要處理家中私事所以一個月前請假，謝謝～」而Ian女友Amy則透過經理人回覆：「我希望有自己的私人空間，多謝大家關心，新年快樂！」雖然被篤爆秘密拍拖，不過一眾Ian Fans仍留言支持及體諒Ian，亦未有如上次跟港姐陳曉華傳緋聞一樣，到女方社交網留言狂踩。