晒脹卜卜靚肌玩直立板過大除夕 泰國男神Nonkul埋唔到岸嚇親

泰國最高票房電影《出貓特攻隊》於17年在港上映，當年兩位泰籍男主角都迷倒唔少香港妹子，當中最受歡迎係喺港產片《一秒拳王》中飾演香港拳王，同周國賢壓軸大戰嘅泰國男神Nonkul （Chanon Santinatornkul），就係因為演拳王，拍攝前努力操肌兼學打拳，電影拍完一段時間，難得男神仲Keep到副靚偈。

今日係大除夕，男神約埋屋企人去咗玩直立板過埋2020年最後一日，半裸嘅佢玩得好過癮，愈划就愈出開始有啲擔心，但佢姐姐仲係掛住影相，男神鬥氣諗住自己划返岸，一直划一直划，但划極同姐姐嘅距離都冇分別。「所以我停止划，然後跳落水邊游邊推板。大約一分鐘後，我轉身望住佢哋，發覺離佢哋更加近。」嚇親嘅男神忍住同姐姐大叫，「你見唔到啲浪同風將我哋吹向大海」眾人聽畢男神說話開始恐慌，亦開始努力划槳。

眾人努力划10分鐘，但結果係，「我哋仍然停留喺同一個地點或更遠嘅地方。」而男神姐姐因為塊直立板郁唔到而嚇到喊，男神形容佢哋為3隻被困海中心嘅豬，「我哋開始驚，但突然發現我哋都有電話，哈哈。」最後，佢哋就打電話畀工作人員求救嘞，對於呢個結束2020年嘅方式，佢話係Happy Ending喎。