想偷懶唔送禮物畀女友　劉俊謙蔡思韵在家睇戲過聖誕

還有3日就是聖誕節，疫情下大家都未能外出，貼心的劉俊謙和蔡思韵（Ceci）就挑選了防疫用品，並親手簽寫聖誕卡，送給身邊朋友及工作夥伴，提醒大家繼續注意衞生迎佳節。回顧過去一年得着，Ceci不忘感謝《幻愛》為她帶來的一切，她感恩地說：「工作上《幻愛》係我一個里程碑，透過這部作品令更多觀眾認識我，亦增加咗唔少其他演出機會，希望2021年有更加多新作品同大家見面！」劉俊謙坦言除了電影《幻愛》之外，好開心同時遇到《二月廿九》這部電視作品，「《二月廿九》獲得新加坡《亞洲學院創意獎》（Asian Academy Creative Awards）香港最佳劇集，係開心事。除咗劇，其實電影、舞台劇喺工作道路上都幾好發展。」

過往幾年在台灣生活的Ceci，感覺香港聖誕氣氛較濃，她回想起兒時寫聖誕卡給朋友，覺得是一個儀式，但隨着年齡增長，現在寫聖誕卡別有一番感受，Ceci邊寫邊說：「寫聖誕卡呢件事喺人大咗反而少做咗，不過今年我都有寫幾張寄去畀台灣嘅朋友，手寫卡係有一種溫度，感覺好唔同。」劉俊謙也憶起自己的一人聖誕：「大概5、6年前一個人去咗捷克背包旅行，行咗個聖誕市集。記得當時天氣好凍，拎住一杯熱紅酒，望住歐洲古董嘅環境，係我幾難忘嘅聖誕。」

二人慶幸未收過「騎呢」聖誕禮物，相反見過朋友收的禮物就幾搞笑！Ceci在派對上見過有人收到一包紙巾，而劉俊謙就表示：「有位女性朋友收過剃鼻毛機，我問過佢有冇用？佢真係有用，而我發現佢啲鼻毛真係少咗，對於我嚟講可能好笑，但對於佢嚟講都係實用！」問到Ceci想收甚麼禮物？她直言冇諗過，劉俊謙二話不說回應：「好嘢，咁我唔使送！」Ceci也唔執輸的說：「梗係送出去嗰個人要諗送咩禮物，冇理由收嘅人去諗想要咩！」一言一語，呢對情侶果然有「蜜」契。

而鑒於疫情關係不宜外出，二人又異口同聲表示會在家睇戲過聖誕，並推介大家：「當然要開心合家歡，笑一餐！《Love actually》就必睇，周星馳都係，就算睇過好多次都係會笑！其實聖誕過節最緊要一齊開開心心。」