【獨家】21歲細仔好乖陪買餸　馬詩慧外賣飯糰餵女

名模馬詩慧(Janet)一家出鏡率都好高，因為呢家人好鍾意玩社交平台，特別係兩個女，分別係下年嫁嘅28歲大女王曼喜（Kayla）及剛有拖拍嘅細女，25歲嘅王麗嘉 (Irisa)，兩姊妹好身材又大方，IG經常大酬賓，巴打鍾意傳媒又有料寫稿，真係唔該晒。講返阿媽，之前佢同細仔，21歲王躍穎（Kadin）去銅鑼灣行超市買餸，大隻細佬陪住阿媽揀西蘭花，阿媽買完餸又驚個女餓親而急買飯糰餵女，買完拿拿臨返歸。採訪:梁志明

大女Kayla九月宣布同拍拖一年多的攝影師女友Elaine Chen訂婚，下年美國結婚。未婚妻係恒隆地產創辦人之一陳曾燾嘅外孫女，中環開設藝術活動空間，有背景又有事業，名模阿媽對呢位未來女兒都好滿意，「呢個女仔幾乖，最緊要Kayla自己鍾意，我哋只係戥佢開心同祝福佢哋，最緊要係佢哋兩個對大家好。」加上細女又開始拍拖，兩個女都有另一半愛錫，Janet應該好安樂。

好細心嘅媽媽
日前傍晚，Janet同細仔Kadin去銅鑼灣時代廣場行超市買餸，兩個女有另一半，唔得閒陪阿媽，好彩仲有個細佬。當日好大隻嘅細佬全程陪住阿媽，冇行開過半步，有時繞住手等阿媽揀西蘭花，又或幫吓眼揀啲日式小食，揀揀吓，Janet打電話畀個女，知道個女餓又未到晚餐時間，即刻揀多兩個日式飯糰先返歸。