【獨家】被CY踢出《造星III》十強獲網民同情　Timo手機任Check笑住爆粗

Timo（江宏基）在《全民造星III》的20強比賽於昨晚播出，對戰同為B組的CY（陳澤言）。先出場的CY演唱蕭敬騰的《王妃》，Timo就跳唱Billie Eilish的《All Good Girls Go To Hell》迎戰。一眾評判都認同Timo強項是跳舞，不過在唱歌方面扣了不少分，評判陳柏宇甚至狠批他唱歌：「我覺得你唱唔得，嚴重唔得，唔應該揀英文歌。下次可以唔唱歌，因為《全民造星》冇話要全民造歌星。」結果CY以4比1揮低Timo，成為第7位進級十強參賽者。落敗的Timo爆喊，原來他一直對前哨戰獲睇高一線，到後來遭網民不斷的攻擊而感到壓力，連監製花姐和導師彭秀慧都認為他失去了當初的星味，真係睇見都心痛。

輸10強贏民心
節目播出後，Timo又跟同樣出局的B組戰友右雨於社交網開Live，右雨大爆對方在比賽中途因負面報道變得沉默，並喊道：「有段時間我哋諗，佢都唔係咁嘅人，不如我哋出Post幫手解釋，但Timo想我哋少啲出聲，出面火勢好勁，唔想影響到我哋。」見日日喺網上被狙擊的Timo獲一眾戰友、導師力撐，不少網民也表示「誤會Timo了」，並大感同情兼揚言不再「反Timo」，大家更紛紛於社交平台留言：「佢話『有信心都唔敢講』呢吓我有少少同情佢，佢呢Round真係冇自信到謝晒」、「其實佢都好慘㗎，被網民狙擊到信心都冇埋」、「佢應該睇到大家啲留言之後，都收斂咗」、「佢可能都唔係咁衰，係被剪接組剪到咁」、「本來唔鍾意Timo，但佢講番反省說話令我接受番佢」等，更有人鼓勵Timo「快啲畀番啲自信自己」，大讚他於前哨戰表演好Charm，相信經歷《造星III》比賽後，Timo會變得更好。

突擊Check手機
正如右雨和彭秀慧所講，其實Timo態度一啲都唔寸，好似早前《頭條娛樂》記者進行突擊大搜查，Timo都好聽話即刻交個背囊出嚟畀我哋開箱，過程中仲見識到佢「怕醜仔」兼「文青龍友」一面。嚟到最後一集，《頭條娛樂》決定即場Check埋Timo手機！

曾經喺「快問快答」環節講過「成日唔記得覆WhatsApp」嘅佢，到底有幾多Message未覆？除咗WhatsApp，仲會公開埋Timo最新下載嘅3個App及最近狂Loop嘅歌。最搞笑係，私密嘢忽然攞晒出嚟畀人睇，平時「牙擦擦」嘅Timo唔知係咪驚得濟呢，竟然中途唔覺意「爆粗」，搞到全場爆笑！咪睇Timo喺節目入面寸寸貢，私底下其實都係一名「暖男」，對一班「Tim飯（Timo粉絲稱呼）」仲好上心，究竟佢點Warm法呢？又係咩歌令Timo怕醜拒絕表演呢？想了解Timo嘅真實一面就快啲去片啦！