【維港會】4歲仔「扭計」不肯落巴士 乘客提醒港媽先落反被鬧多事

香港人生活步調急促，稍微行慢一步阻到人，都可能被鬧「阻住地球轉」。有港媽就表示，日前帶仔女搭巴士，從巴士上層落車時，兒子「扭計」不肯落樓梯。港媽表示自己心急之際，一名大媽叫她「做阿媽嘅自己落先嘛」，辣著火頭，令港媽激動爆粗。不過就有很多網民不認同港媽的看法，認為她才是需要「考牌」那個。

港媽仔「生仔要考牌系列」Facebook群組投稿，稱自己「俾個多口中年大媽激到忍唔住在仔女面前爆粗」。港媽每日都同仔女搭巴士返學放學，因為下層經常滿座，所以都要坐在上層。「因為我試過落車時自己落樓梯先，仔女後落又落得慢，司機未睇清楚就關門，阻埋後面乘客落車而被人鬧過，所以之後每次我都叫仔女落先」。4歲兒子比較頑皮，港媽每次都叫7歲女兒先落，自己再拖實兒子落樓梯。

不過近日帶孩子搭巴士時，兒子突然「扭計」，站在樓梯不肯落。港媽怕阻到人，就心急想辦法「氹」他落樓梯。「喺我心急如焚，好焦躁之際，突然有個中年大媽唔知做咩多口話我：『做阿媽嘅自己落先嘛！』」大媽更一邊搖頭，指她「唔識做人阿媽」。港媽點著火頭，「關你X事呀！多X事幹！」

港媽表示，可能自己也有錯，但大媽不認識她，又不知道前因後果，而且無影響到她，「我唔認為佢可以公開批評我囉！況且識唔識做人阿媽都唔輪到佢講，係我對仔女先可以評論我囉！」

帖文引起熱議，不少網民都表示「大嬸無講錯，有小朋友的，若坐上層，應阿媽落樓梯先，若車突剎車，小朋友會向前衝。而且若小朋友細，應早少少落下層，寧願在下層企，都費事臨急臨忙衝落樓梯」、「睇到『氹』呢個字時，已經明白成件事係點了」、「4歲仔巴士唔肯落樓梯，仲慢慢氹？當然係一手抱佢落去啦！」、「要喺香港被人容許你慢慢落車真係有啲難度」、「無論幾嬲，係仔女面前一定要謹言慎行」。