【獨家】處男個唱隨時三度改期 雷有輝好樂觀仍照常綵排

喺疫情下，太極樂隊主音雷有輝（Patrick）舉行嘅處男演唱會一波三折，由最初8月15日開騷順延到10月，跟住押後到12月19及20日。由於第4波疫情嚴峻，限聚令又再收緊，演出再有變數，Pat哥聽從老闆安排平靜面對：「主辦單位好堅持show must go on，只不過係遲早嘅事。」採訪：方騫平

雷有輝於戲曲中心舉行嘅兩場《Pat Music Over Rainbow》音樂會，由今年8月等到12月，個期改了又改，去到11月中諗住「望見家鄉」開心到癲，特登帶《頭條日報》記者喺場館接受訪問，當時Patrick好開心：「終於開啦，好嘢！好開心，因為多咗幾個月時間畀我做預備，畀空間我磨練同埋優化吓歌單、仲有成個人嘅狀態。」

希望港人多留家抗疫
Pat哥承認演唱會由8月改到10月時的確好失落，心情如坐過山車：「因為嗰時覺得狀態最高峯，到10月演唱會第二次改期反而習慣咗唔太失落，都要為大家健康著想，因為疫症真係未離開，但我相信好似演唱會主題一樣，雨後先會出現彩虹嘛。」可惜計劃不似預期，個唱有機會第3次改期。他語帶平靜說：「呢刻有小小未知之數，但會照常綵排。收緊限聚令去到呢個月16號，個show可以趕得切嘅，我啱啱路過尖東海旁，望緊香港好好嘅海景，心諗『有兩個星期時間畀大家抗疫，如果大家遵守呢個防疫措施，多啲留家，咁就唔會受到感染，兩周後就可以嚟睇我演唱會喇，希望大家乖乖哋啦。』」被指創咗改演唱會期最多歌手紀錄，他無奈笑說：「呢啲紀錄真係多謝晒喇，希望有人破咗佢，我都唔想再改(期)喇！」