【獨家】各有另一半唔好惹麻煩　連詩雅 胡鴻鈞鏡頭外冇交流

雖然疫情嚴駿但TVB仍然趕工拍劇，日前就見到同陳家樂熱戀中的連詩雅（Shiga），及同蔡思貝平穩發展中的胡鴻鈞喺尖沙咀赫德道拍攝《金宵大廈2》外景，因為正值傍晚時份，見有明星仔拍嘢都有好多人圍住睇，可能唔慣又或者唔想咁多人望住傾偈，甚至可能唔想被影到有太多交流，話晒各有另一半，所以現場所見兩人鏡頭後冇乜嘢講。採訪:張詠森

《金宵大廈2》係《金宵大廈》的延續篇，繼續由陳山聰、李施嬅呢對「兩世情人」再續前緣，新一輯共有10個迷離單元故事，新加入的演員有伍詠薇、龔嘉欣、江嘉敏、與及飾演情侶的連詩雅和胡鴻鈞，前者叫科雲，後者係一個裁縫。

話咁快收工
Shiga呢期好忙，因為之前為主演的犯罪動作電影《無間行者之生死潛行》及播映中的《使徒行者3》宣傳，不過有愛情滋潤，Shiga冇乜走樣，企喺街仍然好Sharp，一眼就望到。當日Shiga跟同唱片公司，塊面愈嚟愈細嘅胡鴻鈞喺街頭拍鬧交戲，鬧得唔算太激動，等埋位時兩人冇乜嘢傾，話咁快拍完收工，胡生就行過隔離街上車，Shiga就跟劇組上公司車走。