【第四波疫情】Bob一日內冇晒兩個月工作：好Amazing

香港受第四波疫情來襲，政府宣布收緊市面防疫措施，原本稍見起色的經濟又再大受衝擊。林盛斌（Bob）就在社交網發文，稱今、明兩個月的工作，一日內全部延期或取消！
Bob留言︰「計畫，真係永遠趕唔上變化！眼見10月同11月疫情好似緩和咗少少，然後多返少少人搵我12月同1月去做嘢，正當以為坐足幾圈臨尾可以食返鋪對對糊，袋返少少車錢返到屋企去過呢個年關之際，一日之內，全部通知要延期或取消。個感覺真係好amazing.....但係，我同自己講：『內心強大，冇嘢要驚！』同業們，撐住，頂住！」
正在隔離營接受14天強制檢疫的蕭正楠，在Bob發文留言︰「好有正能量，成段文字同send俾（畀）我嘅一樣，係最尾你同自己講嗰句有啲唔同，印象中好似有好多符號交叉XY！」Bob回他︰「你都係去清潔你間房啦，唔好睇咁多IG啦！」