不敵新貴姜濤  陳奕迅被踢出《叱咤》男歌手五強 

商台《叱咤樂壇流行榜頒獎禮》於明年1月1 日舉行，「叱咤樂壇我最喜愛的男歌手、女歌手、組合」由11月23日中午12時展開，經歷了幾天投票後，終選出「叱咤樂壇我最喜愛的男歌手」、「叱咤樂壇我最喜愛的女歌手」及「叱咤樂壇我最喜愛的組合」最後五強，相對於昨日公布的七強名單，跌出五強的男女歌手分別有柳應廷、陳奕迅、Gin Lee及謝安琪，而最後一輪投票將於下星期一（11月30日）正午12時至12月4日正午12時繼續進行。

 

今年《叱咤》男、女歌手候選名單多度惹來爭議，繼已故17年嘅一代巨星「哥哥」張國榮入圍「我最喜愛的男歌手」，直至七強止步，被劣評「消費」完「哥哥」就飛走他，今次Gin Lee及陳奕迅被out都惹來熱話，有網民戥Gin Lee不值，喺facebook留言：「還我Gin Lee」、「好多人只聽過Gin Lee啲歌，惟一解釋係呢個係商台，佢哋最鍾意名義上一人一票，實際就鍾意為特定人士造勢王，如果唔一早foul強手，又點可以推自己最喜愛嘅人上台？」、「商台啲嘢不嬲小圈子，鍾意小眾上台令觀眾叫囂」。最搞笑有人話期待睇衛蘭vs Serrini，邊個似電單車多啲。

至於陳奕迅被foul，輸畀姜濤及陳卓賢，網民留言：「姜濤、陳卓賢兩個係乜水？」、「新晉奀星…陳卓賢唱得兩嘴，呢件姜濤…除咗豆雞眼，執個粉樣就一無是處。」網民形容陳奕迅去到神枱level，唔使爭呢啲。除咗姜糖繼續力撐偶像外，好多人都話力撐「暴龍哥」及「暖男爸爸」鄭中基。

最後五強名單如下：

男歌手︰林家謙、姜濤、許廷鏗、陳卓賢及鄭中基

女歌手︰AGA、Serrini、方皓玟、林二汶及衛蘭

組合︰Dear Jane、Dusty Bottle、ILUB艾粒、MIRROR及RubberBand