【獨家】同拍擋林子超開健身學校　楊柳青學生多女生男友唔使驚

楊柳青（Wiyona）與林子超（Andy）近日在「疫」境下，合資6位數於上環開設健身藝術學校，Wiyona笑稱幾乎傾盡全副身家，她喊道：「唔好再嘔錢喇，而家要踩單車返嚟喇！」不過，Andy就爆全因對方設計了不少打卡位，二人仲為此嗌了多次交，好在最終都無傷和氣。撰文：黎寶倫　攝影：張詠森　場地：Studio 12

因為楊柳青發現上環一個筍舖，在幼稚園教跳舞近4年的林子超終於圓夢開Studio，在疫境下創業的他無懼生意受影響：「有危先有機，呢度開業1個月，喺冇大肆宣傳下生意都唔錯，好多朋友都已經搵我哋報堂，好鼓舞。」講到在裝潢上花了不少心思，最終更超支3倍，兩人直言為此嗌了多次交，Andy即爆Wiyona性格「港女」愛打卡，他說：「我覺得唔需要咁多打卡位，係咪應該着重課堂同空間多啲呢？但而家我哋嘅拗撬去到尾聲喇。（你讓佢多？）大家互讓啦，我都惡頂嘅。」

雖然對住做事認真的Andy甚大壓力，但Wiyona認為一凹一凸互補也不錯，「做嘢就要互相包容，好似拍拖咁。」兩人又盼繼續合作開分店，Andy更打趣道：「希望分店遍布全球有華人嘅地方！」提到教健身的陳婉衡曾與學生操出師生戀，與外籍男友感情穩定的Wiyona即向另一半大派定心丸：「 我嘅堂以女仔為主，所以唔擔心，男友都鼓勵我去Inspire多啲人做運動，仲叫朋友嚟支持我，我生意好佢都會開心。（男友介意你着性感小背心？）唔會，平時我好男仔頭，唔係幕前咁性感，做運動係好開心、好正面嘅嘢。」