【獨家】一家穿黑衫商場上上落落羅霖兩個仔傍住阿媽撳錢

2020-11-26 18:49

自13年跟劉坤銘離婚後，55歲的羅霖即全面復出幕前養家，供三個細路讀書要用好多錢，不過，話咁快喺美國修讀心理學的22歳二仔劉子熙（Jordan）已畢業，本月初仲跟日德混血女朋友閃婚，做咗奶奶嘅羅霖終可以鬆一口氣。之前見到羅霖同23歲大仔劉子榕（Nathan）及14歲孻仔劉子晉（Jonathan)去又一城櫃員機撳錢，三人全黑裝扮，兩個仔從後傍實媽媽，再望真啲，戴咗黑超嘅細仔高過阿媽，瘦咗，頭髮又長咗，好有星味。採訪:譚壹致

當年羅霖離婚後講過，靠自己養家，冇收過一蚊贍養費，「三個仔學費、生活費各樣支出都好大，尤其係去國外留學，每年加埋食宿三十幾萬，去美國更加貴，每年接近五十萬。」但之後劉坤銘就發聲明指一直有支付三個仔嘅學費，並非如羅霖所指由佢單方面承擔大部分費用。

細仔真係幾有型
真相係點唔知啦，只知羅霖真係好勤力搵錢，就算因為疫情，返內地開兩日工來回要隔離28日都照做，呢位阿媽話：「最緊要有工開，唔可以無了期咁等通關，其實之前已經推咗幾個內地工作，主要係離開屋企太長時間，會掛住兩個仔。」之前就見到羅霖同大仔及細仔現身又一城，三人全身黑，一個跟一個咁行，上上落落咁，兩個仔仲傍住阿媽撳錢，然後行去等七人車離開，等車期間，靚媽不斷幫細仔整理好件衫，無論仔女幾多歲都係父母心目中嘅小朋友。