【獨家】ViuTV冇高佬忍痛拍《男排女將》 193爆肥仔堅鍾意鄧麗欣
2020-11-26 23:30 
真人真事改編的ViuTV新劇《男排女將》，由鄧麗欣率領飾演男子排球隊員的MIRROR及ERROR成員演出。肥仔(梁業)同193（郭嘉駿）唔算重戲份，但都好搶戲，193係「矮仔」隊中嘅最高一個經已好突出，而肥仔就成日搞鬼地帶動氣氛，令戲中眾人Keep住Energy，仲成日𠱁到女神鄧麗欣哈哈大笑。採訪：方騫平 服裝：rulecrossingman_studio
飾演運動健將的193只客串6集戲，在劇中是最強嘅發球手，不過18年他參加《全民造星》時曾經斷過手，原來到𠵱家仲未完全康復，所以肥仔覺得193屬高難度演出。193說：「係呀，做動作易，但近距離鏡頭，觀眾係會見到隻手冇力。」
再三追問下，193坦言有推過戲：「我真係有推過戲嘅，所以戲份唔多，但編劇、導演話呢個角色係為我而設，既然咁講，只好問公司有冇幫我買保險？公司話有先去拍，後來我發現原來ViuTV冇一個高佬可以攔到網，所以咪一定要揀我囉！初頭用力去拍波都痛，但都冇問題嘅，講真打份工，一定要全力以赴，做到最好。」肥仔即搞笑和應：「啱呀！ViuTV宗旨嚟嘛！」193反問：「好似搞錯咗喎！」至於肥仔多數喺場邊打氣，亦不時大聲提醒隊員：「大家快手，爽手啲！」193取笑他喺大wide shot搶Fo，「得鼻屎咁細粒！」肥仔最開心可以同女神Stephy合作，拍煞科戲時仲成功「抄牌」。193踢爆肥仔真心鍾意Stephy，肥仔承認有偷睇女神拍咀戲，心諗：「如果係我就好喇！」193說：「佢淡妝都好靚，我成日近望佢，但佢唔知，Stephy直情係揀嚟做老婆啦！跟住生埋後代，仔女一定係好靚。」
最新回應