【獨家】一家五口玩完水行超市 陳豪陳茵媺教大仔同記者講拜拜

為咗方便仔女返學，陳豪同陳茵媺由大埔比華利山別墅搬去港島南灣豪宅，屋企附近就有靚沙灘可以玩水，不過之前疫情嚴峻，泳灘被封，一家人好守規矩，唔落水齋喺附近曬太陽，最緊要可以畀小朋友放吓電。日前下午，陳氏一家五口又出動，仔女放完電就去行超市，上車離開前，兩公婆仲教大仔陳梓燁同記者講拜拜。採訪:張詠森

陳豪一家五口，生活費唔惹少，好彩一家之主好多Job，來年就孭三套大劇出街，包括《愛美麗狂想曲》、《白色強人II》及《陀槍師姐2021》。三個小朋友唔易湊，所以就算陳茵媺有戲癮都暫時未能復出，唔緊要啦，睇老公啲劇當自己有份拍啦。

一家行超市好溫馨
新冠肺炎疫情時高時低，不過對一向喜歡戶外活動嘅陳氏一家冇太大影響，係唔可以四圍飛啫，但陳豪同陳茵媺都會諗辦法帶小朋友出去玩，早前就畀人影到佢哋去海洋公園玩。其實平日一有時間，陳氏夫婦都會帶小朋友落附近泳灘玩吓沙，當日《頭條日報》記者就見到佢哋玩完行去超市買嘢，陳豪拖住二仔陳浩鋒行先，陳茵媺就拖住大仔及細女Camilla，工人姐姐殿後。入到超市，陳豪同工人姐姐負責揀蛋同生果，陳太同小朋友就四圍睇，行咗15分鐘就離開，臨上七人車前，陳氏夫婦教大仔同記者講拜拜，小朋友即做，個拜拜仲好有力添。