【有存在感】苦練三個月演指揮家劉德華享受被年青人包圍

2020-11-12 10:00

劉德華（華仔）為電影《熱血合唱團》演合唱團指揮家，還身兼監製，原來華仔本身只打算做監製，有意搵素人做指揮家角色，但最終被關信輝導演和劇組說服。為咗演得更神似，他找來「兒童合唱團」的指揮家練習咗3個月的。因為今次他大膽地帶領33位素人學生演員演出，華仔說：「我同其他的演員、導演、編劇不停喺現場搵方向，雖然係難，但開心嘅。最後我哋學到嘅，原來佢哋話，表達同溝通比打拍子更加重要，每個指揮家都有自己獨特動作。」而今次同大班新演員合作，華仔話冇代溝，大家好夾得嚟，而被一班年青人包圍住好有存在感，學會保持青春。

林愷鈴爆同華仔拍對手戲好騰雞
首度演出電影的龔慈恩囡囡林愷鈴(Ashley)飾演迷失，活喺恐慌中嘅中學生，其中一幕她要喺華仔面前𠝹手自殘，她坦言拍攝前壓力好大，但華仔好懂得令對手感到自在：「拍完後因為穿崩見到個咪，我就好擔心要重拍？加上太陽落山又落雨，當時我好騰雞，華仔就安慰我話『唔使驚，𠵱家執圖一點就會消失咗啦！條龍都可以執喺個天度呀！』」另伍詠詩覺得自己演學生群戲時，表現得不太自然，但華仔好懂得搞氣氛，令大家變輕鬆。