【人氣王】chok住拍口罩廣告 MC張天賦處男下海穩袋六位數
2020-11-04 11:00 
《全民造星II》亞軍張天賦(MC) 雖然冇簽ViuTV，但依然係人氣王，上月他應造星導師Miss Chan Chan(陳潔靈)邀請擔任作品展《埋班作樂》嘉賓，有份合唱《標本》。最近他更處男下海拍咗個較大型嘅廣告，口罩廣告商睇中MC夠人氣，唱歌好，而且好有年青人幹勁同埋動力，能發揮香港人精神。
早前MC張天賦喺維港風景下取景，拍攝期間有齊化妝師和髮型師，一行10多人團隊在場打點，排場十足！廣告喺港九新界巴士站都見到他蹤影，算係好揼本，唔少粉絲走遍全港巴士站逐個打卡追蹤！他笑說：「有一晚喺旺角撞到有fans喺巴士站打卡，其實望住一排自己嘅燈箱都幾尷尬，但係又覺得好開心，尤其有位同我玩咗好多年音樂嘅朋友，都喺燈箱自拍後掟相畀我，嗰刻感覺真係好正。」MC張天賦承認喺疫情下廣告收入好唔錯，代言費高達有六位數字。
喺《全民造星II》出身嘅MC有留意熱播中嘅《造星III》，因為自己都有啲朋友參加咗：「都留意到今年好多負評，可能因為佢哋出咗道，啲人對佢哋要求會更高，其實都幾大壓力同幾慘！咁我自己舊年都算係喺一片負評行到民選冠軍，好明白嗰種感受，希望佢哋撐得住，然後個節目播出之後可以幫佢哋平反到啦。」
關鍵字
最新回應