隔住張相都聽到慘叫聲 鄭中基做Gym做到面容扭曲

ViuTV新劇《暖男爸爸》播出後大獲好評，鄭中基(Ronald)應該放下心頭大石。尋晚Ronald上載健身照到社交平台，留言「爛船都仲有兩粒釘」，照片中頭髮長長的Ronald做緊Gym，身後有教練指導正確健身動作，再睇返Ronald個樣，雖然戴咗口罩，但從上半截表情已完全Feel到佢有幾痛苦，隔住張相都聽到慘烈叫聲。

Ronald老友杜汶澤為咗Talk Show瞓身操練，家陣大隻到變咗《變形俠醫》，跟杜生同年一樣48歲嘅鄭中基唔知係咪想挑戰自己，搵埋幫杜生健身嘅團隊嚟Train，但睇佢個樣咁痛苦，唔知可以捱幾耐?加油呀Ronald。