【最長白帶】同小妹妹齊考升級試 三十歲吳業坤滿頭大汗緊張狂嗌

現年30歲嘅吳業坤有氣有力，上年開始操肌變身大隻仔，趁疫情下工作大減，更的起心肝學習，由今年6月開始拜前香港空手道精英運動員李偉志教練為師，學空手道，他更立志：「擁有Airfitness kick boxing經驗3年，TVB劇組武師即場指導3年，何日東小學國術興趣班23年，人稱『人間空氣』既我，決定左（咗）學空手道就唔可以馬虎。」

學咗接近半年，吳業坤由白帶考黃帶，事後在社交平台分享過程，最搞笑幾十歲人，係跟小妹妹一齊考試。原來白帶考生只有他係「3字頭」。吳業坤留言：「學左（咗）五個月第一次考帶，得我一個三十歲既（嘅）呀（阿）叔，其他小朋友有家長陪伴，身旁兩位妹妹完全輕鬆，我就滿頭大汗又錯哂（晒），不過唔緊要啦，一場人生，就任我年輕得無知，生命有限，燃燒下（吓）僅有既（嘅）青春同脂肪。#辛苦教練呢五個月我會繼續努力唔會偷懶 #嚴師出高徒比（畀）啲時間我#香港東道會#叫出黎（嚟）果下（吓）其實好怕醜#糸東流#我真係好怕考試考車都fail#多謝教練好似我家長咁拍片影相。」網民大讚他係有型嘅，係Good job偶像，仲有人發現坤哥叫得最大聲最勁，先聲奪人！