經歷高低起跌 鄭中基出道前獲父親寄語：唔會有第二個張學友

鄭中基受訪港台節目《音樂說》，回憶在台灣出道前的一年過得十分辛酸，又被安排到跟唱歌無關的綜藝節目亮相，令他出到第三張國語專輯時，驚覺與歌手身份愈走愈遠，一度萌生退居幕後的想法。
帶著人氣進駐廣東樂壇後，鄭中基歌唱事業更上一層樓，但他直言對當時香港娛樂圈內的「潛規則」大惑不解，感到十分迷茫。他說︰「我冇諗咁多圈內嘅『政治嘢』，以前好唔明白，去某台客串劇集、做個節目，就會有更大機會入圍樂壇頒獎禮。我唔識呢啲遊戲規則，只係諗如果我好叻呢啲手段，係咪即使唔使唱得叻都得？作為過來人，我依家同後生或新人合作，都會叫佢哋專注創作，呢啲問題就交返我處理。」
由於在音樂以外要開始拍劇，令鄭中基思緒很亂，以致他放工後經常都邀約朋友飲酒訴苦。重談當年在飛機醉酒鬧事的一段低潮期，鄭中基不諱言當時的唱片公司亦放棄了他，他在美國自我進修時，是劉偉強向他伸出援手︰「喂，你都冇嘢撈㗎啦！返嚟拍戲，我畀兩個角色你揀。」那正是2001年由黎明主演的電影《不死情謎》。自《行運超人》起，鄭中基的喜劇形象深入民心，但在最新的電視劇中，他飾演患憂鬱症的單親暖男爸爸，叫人眼前一亮。現實中，鄭中基與子女關係十分親密︰「佢哋唱歌嗰時，我又會加入唱埋一份。我吹緊色士風，阿仔又會拎支牧童笛突然加入。」他的育兒心得是儘量不干擾小孩的選擇，希望他們獨立思考，現在回想這原來深受其父親影響。

爸爸鄭東漢是知名唱片公司高層，他曾寄語尚未出道的鄭中基︰「呢個世界只有一個張學友，唔會有第二個。呢個係你嘅職業，你要自己面對。我唔會主動話你知要做乜，但你有問題可以隨時嚟問我。」要以一首歌總括兩父子關係，鄭中基毫不猶豫地選擇《許願樹》︰「呢首係我爸爸第一首幫我彈嘅歌，當時我第一次喺紅館開演唱會，佢主動提出要幫我彈一首由我作曲嘅歌畀我唱。我爸爸唔係好識講鼓勵嘅說話，呢次係佢咁耐以嚟最明顯嘅一次表達。」