【亞姐2020】退選港姐蔡小蝶奪冠 何雙妍高文君得亞季軍

「2020亞洲小姐競選香港區總決賽」昨晚於大埔總台舉行。在疫情下大會邀請了400位嘉賓到場直擊賽事，直播中可見有半場嘉賓都無戴口罩。15位佳麗跳群舞作開場，可惜舞步完全唔齊。


首先佳麗輪流上場進行才藝表演，表演離不開唱歌及跳舞，不少佳麗都唱到走晒音，其中10號蔡小蝶用對小朋友講話的聲線，自彈自唱《小手拉大手》，同唱兒歌無分別，而13號馮熙淳唱英文歌《I Hate You， I Love You》就似挑戰急口令。

接著佳麗穿上泳裝進行問答環節，當中以2號林寶玉、4號張玥及7號吳燚曦身材最有睇頭，緊接便換上晚裝考演技，眾佳麗七情上面講電影對白，因為神情誇張跟高貴晚裝唔太夾。

經歷超時的比賽，除了早前已公佈的「友誼小姐」及「炫出自我大獎」外，冠亞季軍分別是曾參加今屆港姐並入圍第二輪面試最後退選的10號蔡小蝶、5號何雙妍及8號高文君，其他獎項包括「網絡人氣大獎」得主2號林寶玉、「才華飛越大獎」14號張凱琳、「最完美體態獎」7唬吳燚㬢以及「最上鏡小姐」兼得季軍的8號高文君。而2號林寶玉及4號張玥亦進身五強，將會參與明年一月舉行的總決賽。