【監場事件】莊思明連環出Po寸搏見報 許芯悅爆喊：唔想再被侮辱同詛咒

34C「翻版湯怡」許芯悅（Katie）早前夥拍楊明演出新片，戲中扮演情侶的二人有拖手及挨心口等親熱戲，豈料令有份演出的莊思明「打爛醋埕」，有傳她就算冇戲份或收工仍留低近距離監場，甚至以「女二」身份向「女一」Katie教戲！對此，Katie向傳媒直認被思明的「凌厲眼神」嚇親，仲搞到頭痛又失眠，並強調楊明不是佢杯茶；但另邊廂，思明卻否認「人盯人」監場。

今日Katie到荃灣出席頒獎禮活動時，被問到思明監場事件，她即低頭兼手震，沉默30秒後才哽咽回應：「我唔可以講任何嘢，報道後我收到短訊罵我，唔想再被人身攻擊、侮辱同詛咒我。（邊個攻擊你？）有一個人我唔想提及佢！」問會否怕再遇到對方？Katie邊抽泣邊說：「到時先知道，唔係個個都會將短訊畀記者睇，令到自己可以上C1，C1唔重要、錢亦都唔重要，人矮做Model亦唔代表人格差！（會否找楊明解決事件？）我冇佢任何聯絡方式！」

未待Katie回應事件，另一主角思明已再次出IG Story反擊，十分有「先見之明」！思明留言：「預咗D（啲）講開大話嘅人係唔會咁容易收手架（㗎）啦！你要繼續老屈作故仔搏見報你咪繼續囉，公道自在人心！我又唔知你係邊位，同你講多都嘥氣。#我係受害者都未喊 #人在造天在看 #你想利用我到幾時 #係唔係唔作故仔唔屈人就冇得見報呀」在活動後，思明又再於IG Story發功，她寫道：「其實佢都幾好笑 #想笑死我 #有個小丑氹自己開心都幾幸福呀 #你再講大話小心變咗木偶鼻」