黃雨警告下返舖頭受傷 39歲陸詩韻「爆甲」見紅

陸詩韻(Sharon)係05年港姐亞軍，演藝事業麻麻，但感情生活好豐富，經常有拖拍，而另一半一定好富貴，所以有富豪追擊手之稱，不過追擊手都有生銹嘅一日，近年冇乜點聽過Sharon拍拖，09年離巢TVB後就轉行做美容，做生招牌應該都幾搵到，仲要愈做愈靚，靚到唔係好認得添。

話晒係老闆，Sharon當然會利用社交平台賣吓廣告，好似6D眼睫毛，Sharon聲稱做咗超過3年效果一直都好滿意，仲話「唔使化眼妝，都可以睇落精靈。」不過張相就化咗妝嘅，仲幾濃添。

咁作為老闆，Sharon都好親力親為，就算今日天文台發出黃雨警告，全港落雨落到黐晒線都親自落舖頭拎嘢，仲唔小心搞到「爆甲」見紅，手指留血咁大件事當然要影相放上IG吸關心啦，佢話，「落大雨，落車去舖頭攞啲嘢，咁都搞到爆曬甲，好痛啊，我都係唔適宜太操勞。」胡渭康同Ann Ho都表示擔心，一個叫佢小心啲，一個就嘩咗一聲，仲有Fans留言慘慘豬，唔睇相以為佢傷到見骨啊。