【細So情婦】變身飲食KOL洗底練美施率先教煮撚手喼汁豬扒

2020-09-15 11:30

細So第三者Macy又喺社交網站蒲頭，但今次係教授烹調「喼汁豬扒」，仲留言話，這個餸非常開胃，最適合給小朋友送飯。

前電台DJ蘇耀宗（細So）被揭偷食同樣有家室嘅練美施（Macy），點知Macy一啲都冇避忌，以第三者身份係咁發言，雖然一度刪除個人社交網站及經營多年嘅專頁嚟「冷靜」，但「冷靜期」只得數日，好快Macy已急不及待，陰魂不散式「上水」發文，繼日前發感性長文向子女懺悔後，原來她喺Instagram開咗個新帳戶，至今有3篇貼文。

Macy第一篇發出嘅貼文留言：「生活上的每一個領域，都是不同的食譜，五味紛陳。都有著愛，與其他味道。主理，又何止一種食譜。」至於第2段說：「能改變的，永遠只有『將來』，然而將來是個未知。踏著破碎的自己，慢慢重組，慢慢長大，除了努力，還有感恩。當中離開的、留下的，都是成長中的『監督』。做比說難，但我選擇做，努力做。」

第3篇貼文及短片係教授煮「喼汁豬扒」，留言：「這個餸非常開胃，最適合給小朋友送飯，汁也會撈飯吃光，酸酸地又不會太嗆，適合無胃口的日子，兩小可是一塊厚豬扒配一大碗飯呢！」看似要努力洗底做返個好媽媽，順便由嬰兒用品網站，變身飲食KOL達人，乘勢殺出一條血路。