【獨家】新歌主動寫詞嚇窒監製 Anson Lo@MIRROR自爆中學俾女飛

Anson Lo（盧瀚霆）繼《一所懸命》後推出第二首單曲《Burn Out》，更首度親自作詞。他坦承最初主動話負責寫詞而嚇窒監製，幸好最後靠香薰蠟燭搵到靈感，更自爆創作時想到中學跟同班女同學拍拖慘被飛經歷。另外，Anson近日再有新嘗試，就是遠赴台灣拍攝首部偶像劇，他坦承起初好緊張，幸好早前經過拍《男排女將》訓練，令他對演戲興趣大增。撰文：杜淑霞 攝影：李維隆 髮型：Lydia Yung&Denny Ku@Chic Private I Salon 化妝：Giann,Cori @Annie G. Chan Centre 服裝：D-Mop 場地：JAS Party&Studio

這次作詞決定原來是Anson聽完Demo後主動向監製Edward Chan提出，不過這舉動竟嚇窒了對方，「佢話『吓！』我話係呀真係好想作，可能OK。佢就覆我『OK!wait for good new.』但我突然覺得好大壓力，如果返嚟嗰個唔係good new咪死梗，但係我覺得既然想作就作好佢啦！」

Anson限自己一周內要完成歌詞，但想了幾晚都未搵到主題，一晚打算放棄吹熄香薰蠟燭去瞓，反而得到靈感，「突然間啲煙冒起，一吹就熄咁鬼易嘅，好似一段關係咁，令我突然諗起中五、六一段感情，我同個同班女同學拍拖，唔係初戀嚟，我諗半年度佢就突然間同我講分手，係SMS講但冇原因嘅，我覺得好無奈，keep住SMS轟炸佢，但佢唔覆，返到學校佢又當我好似陌生人咁，我同佢講嘢佢又唔睬我，我覺得分手唔緊要，但起碼畀個原因我。可能好多人試過呢個經驗，或者分手後好想同嗰個人一齊返，好多人會有同感，所以我就用咗蠟燭同分手掛鉤嘅一個主題。」



Anson近日已飛到台灣拍偶像劇《超感應學園》，他承認早前演出《男排女將》對今次演出有好大幫助，「拍《男排》角色對白多好多，一開始我太緊張，集中唔到又享受唔到，口又震晒，大家笑我好chok，又話個偶包（偶像包袱）仲喺度，我唔係專登chok，因為太緊張嘅氛圍，唔可以好似正常人咁講嘢，去到中期好咗好多，令到我覺得記劇本唔係一件咁難嘅事，一開始通知去台灣都驚，但拍完《男排》對拍劇大興趣好多。」