【條腿好長】賀NBA開鑼 吳彥祖將7歲囡囡當籃球拋落水

呢期45歲嘅吳彥祖曝光率好高，前排就講佢髮線上移，近排又話佢成面油成個油浸大叔咁，啲評語超Mean，不過阿男神懶得理你，繼續好Hea咁同音樂人老友Jerald（陳哲廬）喺網台節目《本週Jer住你》吹水，仲大爆郭偉亮同馮德倫曾經喺謝霆鋒屋企為咗玩啤牌而鬧大交，最離奇阿前謝太半點反應都冇，仲掛住喺個廳打木人樁，有畫面得嚟好好笑。

吳彥祖係NBA球隊勇士嘅死忠Fans，因為聽日NBA新賽季開鑼，所以佢有啲激動，仲話要向Stephen Curry致敬，更希望Draymond Green可以畀啲顏色湖人睇吓。重點係因為佢太興奮，所以罕有地Post同7歲囡囡吳斐然（Raven）玩水嘅片，佢仲當個女係籃球咁拋落水中嘅圈，難得阿囡好配合，從而發現Raven手長腳又長，似足名模阿媽Lisa S.一樣。