靠自身免疫力對抗病毒 施匡翹隔離24日仲未走得

2020-08-11 17:00
施匡翹預告本周四「復工」為新城電台節目《猜情尋》擔任主持。
施匡翹預告本周四「復工」為新城電台節目《猜情尋》擔任主持。

24歲女歌手施匡翹(Zaina)於上月18日確診新冠肺炎,成為香港首位「中招」藝人!其經理人劉麗萍(Apple姐)、Apple姐男友麥德羅及宣傳人員阿佳,雖然早前也染上新冠肺炎而入院,但經治療後,眾人於上月底陸續康復出院。無奈一路都冇乜病徵的Zaina,由醫院轉到鯉魚門度假村隔離營,至今足足被困24日,仍未「重獲自由」的她今日以短訊透露,「而家感覺都OK,其實由入院到而家都冇話好辛苦、好唔舒服,好似一個正常人咁,但好多人都關心我點解咁耐都冇消息,冇話可以離開隔離營,係因為隔離營同醫院有少少分別,呢度每日都會驗我嘅深喉唾液去睇病毒數量,佢哋要求兩次都係Negative(陰性),醫生先考慮其他因素俾唔俾你離開。到目前為止,我試過一次係Negative,唔係連續兩次,所以仲未可以離開,但醫生同我講,我嘅病毒量都接近冇,係需要啲時間等佢更加穩定,咁就更安全。」

施匡翹預告本周四「復工」為新城電台節目《猜情尋》擔任主持。
施匡翹預告本周四「復工」為新城電台節目《猜情尋》擔任主持。

相比有接受藥物治療的患者,施匡翹隔離的時間較長,是因為她沒有食任何西藥或打針,她續道:「醫生都建議我唔好咁做,因為我年紀比較輕,而且冇任何唔舒服,所以寧願等我自己慢慢好番,對日後嘅健康更加理想,咁我都聽醫生意見及認同,純粹隔離,觀察吓血壓、體溫……醫生話我係正常,因為好多年青人冇食藥,靠自己免疫力康復,都起碼要28日先好番。」除了進行深喉唾液測試外,施匡翹透露也可抽血,若驗到有抗體便可離開,但謂:「由於鯉魚門隔離營嘅抽血設備唔夠,每日只揀選某啲人做,咁我就聽日去做抽血程序,如果驗唔到抗體,我就要驗番深喉唾液。」

抱樂觀心情面對的施匡翹深信好快就「放生」,又開心預告本周四(13日)便「復工」,將
於晚上9點為新城電台節目《猜情尋》做主持,但由於仍未可離開隔離營,故今集她會預先錄音,「我喺隔離營已經錄定音,同大家分享好多人想知嘅問題,咁我都交低咗俾主持人Tony,喺今個星期四播俾大家聽,亦會分享我喺隔離期間成日聽嘅歌,希望大家身體健康,我都會早日康復,健健康康咁恢復工作、同大家見面。」

關鍵字

最新回應

關鍵字

相關新聞

熱門文章