【有話說】IG直播解讀「食鹽抗炎」  施匡翹被網民攻擊自爆曾傷心流淚

現年24歲嘅女歌手施匡翹(zaina)確診新冠肺炎，住院期間狀況良好，一直沒有任何病徵，目前已被安排遷往入住渡假屋形式嘅隔離營，昨晚她更喺獨立房間內做直播，除咗報平安及感謝一班醫護人員偉大奉獻，喺室外熱辣辣冇冷氣工作間為病人提供護理及服務外，更分享確診的感受及面對新冠肺炎心得，同時亦為一眾病人打氣，分享正能量鼓勵他們：You Are Not Alone！

 

對於有網上討論區瘋傳，指施匡翹於留院期間要求醫院在其膳食中加鹽，惹來爭論及負評，她亦有提及此事，澄清道：「關於食鹽個post，我覺得太搞笑啦！呢10幾日經歷咗太多波折，由確診開始好徬徨，呢個經歷好特別，都有少少睇化咗，當然畀我揀，我唔想經歷呢啲事，冇人想用唔舒服去被人關注，有晚我忍唔住喊咗出嚟，反問點解會咁樣？點解會發生呢啲事？仲有，啲報道點解會咁？一個人唔舒服經已好sad，仲要咁做。我知有好多人喺網上批評同埋攻擊我，最初完全接受唔到，反問點解佢哋會咁講？而且唔係事實真相，但𠵱家已接受，公眾人物要承受，同埋我冇再上網回應佢哋，因為我根本冇做過，相信你嘅人一定會信你...就算係感冒，連醫生都建議用鹽水嚟漱口，呢樣唔係乜特別嘢。其實開Live最直接，可以直接問到我有關肺炎資訊，我亦藉此提醒大家要小心，有啲嘢預計唔到會中咗，好似我咁由一開始到𠵱家都係冇病徵，真係好可怕，所以大家唔好以為唔關自己事，係要認真對待。」




 

接獲確診通知情景畢生難忘

她又憶述當日知道經理人確診後去做檢測，換上照肺袍等結果，坐足5小時後接到醫生來電問：「你身體有冇唔舒服？講過唔好消息你知，你係中咗！會安排你入院！」她形容當時難以置信，不斷反問：「點解會咁！」相當徬徨。呢幕真係畢生難忘，亦啟發她體會到人生無常，要珍惜身邊人。至於康復後工作安排，一切交由經理人處理，完全係未知：「盡力做好自己，冇嘢可以控制到！」

 

激動掩面：好掛住呢個世界！

由於隔離營沒有電視，施匡翹睇書解悶，因為網絡問題，噚日朋友給她數據卡上網，她上到網做直播表現激動，不時隔住口罩用手掩嘴，又用手捽眉毛及眼線澄清住院期間冇化妝，不過卻強調房內沒有其他病人，本可以除口罩，卻不想畀人亂講再惹來爭議，最慘會有人相信。她又興奮跟粉絲及網民打招呼說：「我好掛住所有嘢呀！我都好掛住呢個世界！因為實在發生太多事，完全係唔知點樣去面對，有太多朋友關心我𠵱家點樣，所以我想畀人知我冇嘢，我覺得我好健康。」她又展示隔離營環境，內有單人牀、牀頭櫃、冷氣、長期密封窗戶，又表示膳食比喺醫院好，仲有紙包飲品及香蕉提供，因為沒有同房病人，她還可以做吓運動及唱吓歌。營入面一日食足3餐，冇嘢做到日日等食飯！