為撐男友劉俊謙妹妹　蔡思韵被網民笑：和謙謙放閃

劉俊謙和蔡思韵舊年合作電影《幻愛》撻着，雖然佢哋喺電影正式上映前，已經好大方公開戀情，之後拍住做宣傳，一齊接受訪問，但佢哋態度都唔算好高調。不過呢日電影雖然宣傳完，佢哋反而突然被網民狂指放閃。其實係劉俊謙先以「絕對Hardsell之我妹妹是書法字體設計師」為題，大讚完一輪妹妹外，仲貼出同有靚靚英文字體嘅玻璃蠟燭台嘅相，當然有tag埋妹妹個ig啦！隔咗一粒鐘，到蔡思韵又貼出類似嘅相，雖然只係寫啲打氣說話，但後尾寫埋「謝謝才華洋溢的書法字體設計師」，然後亦好乖tag埋男友嘅妹妹ig。當然呢個隔空放閃舉動，逃唔過網民嘅法眼，即時在蔡思韵ig留言話：「和謙謙放閃」、「閃到眼睛盲了」。不過，俊男美女組合，大家都好樂意睇佢哋放閃嘅！