【安安廚房】天時暑熱食譜 余安安教整零失敗醉雞翼

因為抗疫Stay Home，好多藝人都變身廚神係咁整嘢食，中式西式日式，又甜品又焗麵包，非常精彩。

余安安都好鍾意喺IG Show廚藝，最新有適合天時暑熱食用嘅冰凍醉雞翼，究竟點整?安安姐無逐Part教你，佢只係show咗幾張相，一張材料相，有雞、杞子、冰糖、花雕、玫瑰露酒同糟鹵，一張熟咗嘅雞翼相，一張雞翼浸住酒嘅相，同埋製成品相。

當你睇到成頭黑人問號時，有網友忍唔住留言問點整?安安姐就回覆製法嘞。
調味：
花雕酒，酒糟，玫瑰露少少，（杞子浸軟），冰糖（要先煮溶）
校啱自己嘅口味。

製作:
雞翼一定要洗乾淨，用水加鹽浸半個鐘，將啲血水浸晒出嚟。然後用最慢火煮佢20分鐘，之後再用大火煮3分鐘將佢逼熟。拎出嚟風乾就可以用之前預備好嘅「調味酒」浸過夜就得㗎啦。

製法非常簡單，堪稱零失敗。