【唐老鴨是亮點】被網民踢爆暗地放閃 湯洛雯將馬國明至愛着上身

湯洛雯（靚湯）與馬國明（馬明）自上月13日公開戀情後，二人愈愛愈高調，繼貼出小馬與獨角獸公仔合照後，早前他們又以「情侶裝」連走兩場友人飯局，靚湯上月仲帶埋馬明去同湯媽媽慶生，可謂已互相融入大家的生活圈！而近日，雖然本港爆發第三波疫情，全城憂心，但有愛情滋潤的靚湯心情好，心態都特別樂觀，剛才她於社交網貼出一張海旁獨照，並寫道：「Good weather keeps me positive.」

驟眼睇張相好似冇乜特別，不過心水清的網民就發現到件衫有啲「景轟」，大家紛紛留言：「Donald duck的衣服是亮點」、「唐老鴨！馬生最愛」、「馬明最鍾意的唐老鴨，另一種的放閃方法」等，原來靚湯將男友至愛的唐老鴨着咗上身，身為唐老鴨忠實粉絲的馬明，曾經都講過家中有過萬件唐老鴨珍藏，每年更會全家為隻唐老鴨公仔買蛋糕慶生，真係好瘋狂！而家仲感染埋女友，有人都忍唔住問：「件衫係自己買？定係人哋買俾你㗎？」、「馬明給你的吧？」係囉，係你自己買嚟着？定係俾人逼着㗎？