【獨家】陳展鵬讚唇厚夠性感唐詩詠驚覺自己有另類戲路

2020-06-23 20:25

曾經係「御用拍擋」嘅陳展鵬、唐詩詠繼去年《唐人街》後再合作，今次喺文偉鴻新劇《超能使者》中玩到豁晒出去。日前拍一場戲，講詩詠要聞展鵬個Pat Pat，男方再篤她塊面然後變吹氣Mary公仔。事後展鵬指詩詠唇厚既性感又可愛，詩詠笑言原來自己有另類性感！採訪：方騫平攝影：譚壹致

喺疫情下需要歡樂，所以《超能使者》係一部瘋狂式喜劇，首次演呢類劇種嘅陳展鵬及唐詩詠異口同聲話已經豁咗出去，點樣做都唔會尷尬，只係會盡力去配合，好彩兩人好有默契，唔怕玩多啲。日前兩人一早拍一場搞笑戲，講飾演臨時演員嘅展鵬誤會畀臨記阿頭唐詩詠整蠱，搞到吊咗好耐「威吔」，整痛「小鸚鵡」，他痛到戚住褲襠，O形腳行路。因此，他「大報復」，搞到詩詠要彎身曲腳去聞佢籮柚，又要扮吹氣Mary嘅鯉魚嘴，更要「罰坐」無影凳，詩詠坦言：「好彩有做開運動，但都好攰。」

吊「威吔」有心得
展鵬笑指詩詠雙唇夠厚，好有扮吹氣Mary嘅潛質：「不過呢個Mary既性感又可愛，係人工智能升級版，入得廚房出得廳堂。」詩詠笑說：「𠵱家發掘到自己多一個優點！原來係有另類性感，佢畀到信心我行另一條路線！」展鵬說：「我哋前期成日合作，但有段時間戲路唔啱，我愈搞愈成熟變咗大叔咁，佢就係宅男好鍾意嘅女神。」兩人又話吊「威吔」好易勒痛下身，展鵬自爆經驗之談，吊「威吔」時他的「小鸚鵡」要放正喺中間位才安心。