姜濤新歌破100萬View　花姐找數跳手勢舞獲讚

組合MIRROR成員姜濤（姜B）早前推出Solo新歌《蒙著嘴說愛你》MV，上周還找來一眾前輩合拍「星級特別版」MV，包括鄭裕玲（Do姐）、謝安琪、林奕匡及許廷鏗等，姜B更預告：「MV超過100萬View花姐（經理人黃慧君）跳畀你睇。」結果官方MV發佈短短兩個多禮拜，已快速衝破100萬觀看率，至今（19日）總數直逼105.5萬Views！

講得出做得到的花姐昨晚立即「找數」，在社交網貼出跟姜B一齊跳《蒙》曲的「手勢舞」短片及鏡後花絮，片中，見花姐食飯都望住個Mon苦練舞蹈，跳了一半她已唉聲嘆氣，連掌鏡的工作人員都忍不住竊笑，百厭的姜B就忽然「亂入」，好風騷地邊跳邊轉入廁所，花姐留言：「我真心覺得呢條片好好笑，『得戚老姜與苦命老花』呢個對比一絕，所以要出Po記低。」隨後，姜B傍實花姐正式Roll機跳「手勢舞」，花姐都尚算跳得有板有眼，在旁的姜B則邊睇好戲、邊陰陰嘴笑，不過最後也有讚對方：「好勁呀！」

花姐在此Po寫道：「找數系列：寧願跳多次bungee jump都唔想跳舞，點解經理人要跳舞，2M view做咩好？」事後不少大讚花姐跳得好好、好勁，連宅男女神陳瀅都留言：「So cute!」又有人提議過200萬Views不如成隊MIRROR聯乘ERROR及花姐一齊跳，唔知姜B同花姐點睇呢？