做埋新手貓奴 單身江美儀寄情寵物大滿足

向來係「狗奴」的江美儀喺三周前做埋「新手貓奴」，最近經常喺IG大晒兩個月大貓女Tasha嘅可愛靚相，白底淡灰色毛嘅Tasha精靈活潑，可愛到不得了，加上呢隻「孻女」比家中小狗哥哥及姐姐聰明得多，好快成為新寵兒，冧到爆嘅美儀說：「哎呀，佢攞我命呀，又靚又聰明！」

 

今次養貓純粹係緣份：「我從來都唔鍾意貓，直至有次行山，喺士多度見到Tasha嘅孕媽，佢媽媽都好靚，咁我就鍾意咗貓，知道佢生咗10幾隻BB後，就特地去揀咗隻同媽媽一模一樣嘅餅印BB收養，隻貓BB就係Tasha，佢得意同靚到呢！𠵱家我後悔揀得一隻咁少，至於將來會唔會再養多隻貓就隨緣啦！養貓前我搵咗傳心師同我家嘅Tina、Teddy及同住妹妹養嘅Jack、Simon傾晒偈，溝通咗先，暫時4狗都接受呢個家庭新成員，Tina仲會守護喺Tasha籠門口，我諗佢哋識得交流。」

 

充滿愛心嘅美儀寄情動物，單身得相當Happy，講起貓狗經就停唔到口：「貓好聰明，暫時覺得比較獨立，因為要等佢適應環境，暫時先困籠隔離，但佢只得六個星期大嘅時候，就識得開籠門出去玩，問佢嘢仲識答我添！𠵱家只好喺籠門度加鎖。」