【男人的浪漫】約埋森美張繼聰dress code玩私影 張振朗女友明讚放閃

一班麻甩佬約埋除了做運動、踢波同劈酒之外，其實仲有好多嘢玩，講的當然並非「多人運動」呢種啦！仲有啲好浪漫的玩意，就好似森美、張繼聰同埋張振朗咁，揸住架深愛電單車，去到山旮旯咁遠，仲有埋dress code擺晒甫玩私影，都咪話唔開心呀！森美就好簡潔咁留言：「唔寫啦，男人私影，原來咁開心！」到張繼聰就話：「去到山旮旯，擺甫士，依份堅毅，唔係人人有......不過，我地有」至於張振朗留言冇乜特別，只寫道：「個份堅持就係無論有幾熱都好，件軍褸都唔可以除，因為琴日dress code係 #vintagemilitary」雖然啲靚仔相，真係影得幾型，但最閃反而是張振朗女友楊偲泳（Renci），在張繼聰同張振朗合照貼文度留言話：「右邊幾型左邊仲型」當然左邊嗰個就係指男友張振朗啦！張繼聰就回應她，「有d嘢好主觀好盲目嘅」Renci再覆：「冇計頭先有把刀行住條頸」最正是跟住張振朗亦加埋把口話：「其實佢係（喺）我面前唔係咁講.....佢話你型好多......我係番薯......」張繼聰再回覆張振朗：「口不對心，女仕專利」又同Renci講：「叫你唔好讚得佢太過分？」好彩張繼聰冇畀呢對小情侶閃盲啫！