【頭條獨家】「女飛躍王」受歡迎張曦雯王浩信中環過馬路被圍

2020-01-16 19:00

雖然好多網民籲罷睇TVB，但TVB依然仲係好多人睇，你睇馬明拎視帝幾多人講。本周二下晝，王浩信同張曦雯(Kelly)為《踩過界II》喺中環拍外景，劇情好簡單，兩個人等過馬路同埋過緊馬路，有明星睇，仲要係TVB藝人，好多人企定定睇拍劇，不知幾熱鬧。採訪:張詠森

張曦雯剛喺台慶頒獎禮打低強敵湯洛雯拎咗「飛躍進步女藝員」，當晚張曦雯坦言曾幻想得獎，但上到台就呆晒，因為要向太多人致謝，更揚言下個目標係爭視后，好有大志，其實講咩無乜人記得，因為佢件衫實在太Sexy太搶Fo。

快拍快散
當日下晝，拎住盲公竹嘅「盲俠」王浩信同張曦雯現身中環雪廠街拍外景，劇情唔特別，就係等過馬路同過緊馬路，因為實在太簡單，拍咗半個鐘就收貨，王浩信秒速閃走，張曦雯就上服裝車換返條褲就同助手截的士走。由拍到拍完，十字路口都企滿人，個個好得閒咁睇拍劇，條街集結咁多人好危險，記者影完都速閃保平安。其實上個星期，張曦雯都喺中環另一個街口拍外景，劇情同樣係過馬路，拍完仲有幾個女途人搵佢影相，巴打界嘅女神都有女Fans㗎。