【頭條獨家】傾3個月電話先約出街 湯洛雯自認好宅難搵對象
2020-01-10 02:10 
湯洛雯在《丫鬟大聯盟》中演的丫鬟「月皎」，為了幫心上人「傅有為」（謝東閔）上京考科舉，甘心賣身為婢，認真戀愛大過天。現實中靚湯自認有拖拍一樣瞓晒身，所以擇偶要審慎，不過單身年多的她，一啲都唔心急，自認好宅的她，更要求對方先傾3個月電話了解，再慢慢約出街，免得未開始已被傳媒影到要解釋，相當小心喎！撰文：杜淑霞 攝影：張詠森
靚湯早前頂替黃心穎拍《法證先鋒IV》時，體重達高峰期140磅，靠計算卡路里飲食及做運動成功搣甩20磅肉的她，除了感身體出問題外，原來有把聲音令她扚起心肝去減，「我嗲哋係唔多出聲，好認真嗰種人嚟，佢都同我講『湯洛雯你快啲減肥啦！你真係好過份！』我上鏡同真人佢都頂唔順呀！」
強調自己唔高竇
去年跟拍拖4年的羅天宇分手後，靚湯一直單身，早前兩人去挪威拍《3日2夜》被指翻撻，不過隨着本報踢爆羅天宇撻着戴祖儀後，靚湯仍然未有着落，不過她話唔心急，「未遇到一個啱嘅，不如就單身，我要拍長拖，認識要好長時間，同埋我係幾戀愛大個天，會擺晒個心落去，情緒起伏好大，所以要小心啲。」
講到靚湯擇偶要求，原來都幾「高」，「細個要靚仔，𠵱家最着重心地善良，同埋孝順，外貌上最好180cm以上高，因為我個頭比較大，高小小好啲，唔想好似保護佢咁。」連父母都投訴好宅的她，談到搵對象仲有補充，「大家要傾3個月偈先，再出街，我唔想去啲太遠嘅地方，好懶呀！哈哈！兩個人出去食飯，畀人影到又要解釋，唔想好似承諾咗咁，以為係一對，但我唔係高竇呀！唔係要追好耐嗰啲，啱嘅我追佢都得㗎！」
最新回應