【頭條獨家】提孫兒笑騎騎　狄波拉夫婦平民餐廳撐枱腳

謝霆鋒與謝婷婷都已經做晒父母，作為媽咪的68歲狄波拉（拉姑）亦正式甩晒身，可以得閒弄吓孫過日晨，又可以約朋友High-tea講吓啲小朋友幾咁可愛。日前，拉姑則與老公鬍鬚Kong到銅鑼灣一間平民餐廳撐枱腳，其間未知是否講起三個孫仔孫女呢？她忽然笑得勁開心，連老公睇見都服咗佢，不禁瞇瞇嘴甜笑！採訪：梁志明

狄波拉一向都好錫兩個孫仔Lucas和Quintus，以往過時過節仲會買定禮物，等見兩個「金叵蘿」，不過今次聖誕張栢芝就帶了兩個囝囝去外地，好在仲有9個多月大的B女玩吓 ，事關去年6月驚爆已秘密做媽咪的謝婷婷，在加拿大「神隱」數月後，早前她終於帶埋囡囡Sara返港見公公、婆婆，之前一提起孫女，拉姑都興奮大讚：「肥肥白白，笑聲可愛。」

日前晚上7點，趁住班細路哥各有各忙，拉姑便跟老公鬍鬚Kong以「紅白情侶裝」，到銅鑼灣平民小店人和荳品廠飲豆漿、食豆腐，雖然店內有長枱，但二人卻選擇坐在角落狹窄的卡位撐枱腳。食飽後，他們卻未有即時離開，拉姑仲頭昂昂周圍望，未知是否老公太沉默，悶到她即時「飯氣攻心」擘大口、打晒喊露，不過拉姑都好有儀態地用隻玉手掩一掩小嘴。此時，鬍鬚Kong都意識到另一半好Boring，終於開金口撩吓老婆傾閒偈，唔知係咪講起啲孫仔孫女呢？拉姑忽然笑到咔咔聲，見到伊人咁開心，鬍鬚Kong都忍唔住瞇瞇嘴笑！最後，他亦好Gentleman地等埋老婆先去畀錢，兩夫婦在門外見到記者都即刻Nice爆微笑。