【頭條獨家】跟未來外父學做生意 E-kids Alan一腳踢賣老火湯

2020-01-09 23:00

組合E-kids成員林詠倫（Alan）努力跟未來外父學做飲食生意，最新動作係跟女友的家人一齊投資外賣老火湯店，由揸咪轉揸湯勺，Alan形容係人生一個重大挑戰，一切由零開始。採訪：方騫平

林詠倫的老火湯店開業當天，隊友Tim和張立基挺身力撐，Tim仲改《開始戀愛》歌詞贈慶，加入冬菇、花膠等食材入歌詞內，相當搞笑。Alan話Tommy做咗大忙人嚟唔到，但會屈他買湯券支持吓。Tim見到兄弟有新的開始都戥他開心：「尤其𠵱家我哋呢個層面係難搵食嘅，除非可以做到陳奕迅、容祖兒咁收入穩定，如果只靠出show錢真係好大件事，自己都試過好冇錢嘅日子。我哋可以唔放棄娛樂圈，但要喺出面建立事業，要多方面發展。」

由零開始學起
雖然喺飲食生意上只係做「學徒」，但Alan形容新店開幕時開心得似做新郎哥一樣：「跳得舞多手腳都會勞損，所以向經營跳舞學校的Tim取經學吓做生意，對我都係個挑戰，由解凍、買料、斬雞、落料，甚至送外賣都要做。初時壓力好大，怕唔知醒起身，𠵱家一早五點半起身學煲兩款湯，以前五點半都未瞓啦，尤其未做過煮飯嘅人好吃力，試過燙到手指起水泡都唔知，以為係畀花膠黏住手指呀！但煲到足料靚湯好有成功感，女友最開心，因為以前我好似少爺仔咁，𠵱家變身暖男。」他又強調只係小股東，經濟上唔使靠未來外父。