【头条独家】跟未来外父学做生意 E-kids Alan一脚踢卖老火汤

2020-01-09 23:00

组合E-kids成员林咏伦（Alan）努力跟未来外父学做饮食生意，最新动作系跟女友的家人一齐投资外卖老火汤店，由揸咪转揸汤勺，Alan形容系人生一个重大挑战，一切由零开始。采访：方骞平

林咏伦的老火汤店开业当天，队友Tim和张立基挺身力撑，Tim仲改《开始恋爱》歌词赠庆，加入冬菇、花胶等食材入歌词内，相当搞笑。Alan话Tommy做咗大忙人嚟唔到，但会屈他买汤券支持吓。Tim见到兄弟有新的开始都戥他开心：「尤其𠵱家我哋呢个层面系难搵食嘅，除非可以做到陈奕迅、容祖儿咁收入稳定，如果只靠出show钱真系好大件事，自己都试过好冇钱嘅日子。我哋可以唔放弃娱乐圈，但要喺出面建立事业，要多方面发展。」

由零开始学起
虽然喺饮食生意上只系做「学徒」，但Alan形容新店开幕时开心得似做新郎哥一样：「跳得舞多手脚都会劳损，所以向经营跳舞学校的Tim取经学吓做生意，对我都系个挑战，由解冻、买料、斩鸡、落料，甚至送外卖都要做。初时压力好大，怕唔知醒起身，𠵱家一早五点半起身学煲两款汤，以前五点半都未瞓啦，尤其未做过煮饭嘅人好吃力，试过烫到手指起水泡都唔知，以为系畀花胶黏住手指呀！但煲到足料靓汤好有成功感，女友最开心，因为以前我好似少爷仔咁，𠵱家变身暖男。」他又强调只系小股东，经济上唔使靠未来外父。