【頭條獨家】《多功能》首演自戀賤男監製陳寶華爆黃浩然唔敢拍

2019-12-20 00:30

編寫個多套收視劇集的金牌編審陳寶華，相隔16年最近回歸港劇，監製《多功能老婆》引起不少話題，更靠好劇本吸引到影后級的楊千嬅再拍劇集。寶華姐坦承今次回歸因不忿港劇被踩唔好睇，決定拍套好戲。她爆搵千嬅和黃浩然演出時，千嬅單聽故仔已眼紅紅；浩然最初就不敢做自戀賤男。她仲大爆洪永城為怕着泳褲現肥腩，一度向她大脾氣要求她先着三點式。撰文：杜淑霞攝影：李權威

寶華姐坦承返內地發展後，確實少留意港劇，直到聽到一句說話，令她腎上線素颷升，「我喺內地聽到有人話依家港劇唔好睇，雖然我冇研究港劇好耐，但聽到都好嬲，好唔鍾意咁可以點，跟住腎上線高咗，所以決定今次返嚟為港劇出番一分力，為港劇服務。」

怕現肥腩發脾氣
講起搵千嬅出任女主角，寶華姐坦承最初冇諗住她會答應，「我只係同佢講個角色係一個奉獻型嘅女人，跟住同佢講咗啲場口，我眼紅佢又眼紅，之後嘅條件係公司再同佢傾，之後公司話佢答應咗我都唔信，我諗佢都係想為港劇出一分力。」至於男主角黃浩然演繹的賤男「尚劍雄」，連他太太都公開話憎，原來最初浩然確實唔敢演，「我識咗浩然好耐，知道佢承擔到啲咩，我同佢講呢個角色時，佢諗咗兩秒問我『我得咩寶華姐？』我話點會唔得，我唔會寫得好核突，我啲戲冇牀戲嘅。佢又問過我『生到我咁樣要鍾意我有幾難』呢句對白好寸，我話都未夠自戀。」

提到拍攝時的搞笑事，寶華姐即大爆洪永城竟然向她發脾氣，「嗰日拍場沙灘戲，幾個男仔要着泳褲，我問洪永城點解仲唔換，佢發脾氣話『你換比堅尼我咪換囉！』柏豪同（王）梓軒都呆咗，我望吓佢個肚腩，我話『你自卑呀？』佢再話『佢哋個個咁fit，尤其係柏豪！』咁佢抑鬱到叫我換比堅尼，我都要照顧演員嘅情緒，咪改咗啲對白囉！」