【頭條獨家】雙J戀淺水灣撐枱腳行沙灘 羅天宇搞掂戴祖儀

去年，32歲羅天宇(Joey)跟拍拖4年的湯洛雯分手，兩人強調無可能復合，而男方亦透露今年繼續單身過聖誕，感情事方面，「要認真考慮，事業為先。」話口未完，一向「識食」嘅Joey原來已有新對象，新歡又係叫Joey，佢係星夢力捧新人，喺《多功能老婆》中飾演周柏豪女友嘅戴祖儀(Joey)。日前晚上7點，雙J喺淺水灣約會撐枱腳，笑住食甜住傾，再玩人哋隻狗傳情，食飽再貼住行沙灘，其間曾疑似拖手，恭喜羅天宇，今年聖誕唔使做單身狗嘞。採訪:張詠森

羅天宇曾於訪問透露今年第二年單身過聖誕，藝人講感情真係一成都唔好信，事關Joey訪問後無耐已被本報記者拍攝到佢約戴祖儀去淺水灣撐枱腳。

玩狗傳情
當晚7點，雙J喺淺水灣一間半露天餐廳食飯，兩人揀選近門口位坐低，兩人食得好開心，不斷講不斷互相遞電話畀對方睇，羅天宇動作好多令本來穿黑色外套的男方熱到要除外套露出白Tee，變相情侶裝。 因為隔離枱食客帶咗兩隻狗仔，同樣愛狗的雙J一齊蹲低玩狗，男方更幫女方同狗仔影相，非常體貼。

沙灘漫步
又食又傾又玩狗坐足兩個鐘終於埋單，由羅天宇找數，離開後兩人又蹲低玩另一隻狗，玩夠就行去便利店買水，然後又貼住行返轉頭落沙灘散步，中途疑似拖咗幾秒手，唔知係咪怕太揚，兩人行咗一分鐘就走，之後經商場行去停車場，由羅天宇駕車離開。