【頭條獨家】為演《多功能》唔續大律師牌黃錦燊望跟妻兒做對手戲

2019-12-19 18:17

70歲的黃錦燊相隔18年最近再演出劇集《多功能老婆》，他坦承人生只做過三個職業，都是自己選擇和喜愛，所以一直都有戲癮，只因做了大律師後，不方便太高調，而且拍戲時間難就，不過難得監製陳寶華邀請，加上大律師工作太高壓，決定暫時唔續牌放鬆一下，專心拍好這個劇，仲想跟太太趙雅芝和囝囝黃愷傑合作。撰文：杜淑霞攝影：李權威

黃錦燊97年在《真情》演「好姨」男友「貓屎」，一直深入民心，之後修讀律師課程轉職大律師，原來他仍然愛演戲，「我人生做過三個職業，藥劑師、演戲同律師都係我自己揀，所以都係好鍾意，只係因為大律師唔方便太高調，況且開庭時間唔到我哋控制，如果拍嘢真係好難遷就到，唔通同個官講我有外景咩，所以咪冇再拍嘢。」

粉絲上身
不過，今次《多功能》由當年《真情》編審陳寶華出任監製，黃錦燊當然會支持，更為接拍該劇暫時唔續大律師牌，「其實大律師係個好高壓嘅工作，自己都想放鬆，所以暫時唔續牌專心拍個劇，好開心再同寶華姐合作，仲有上等家姐（《真情》中的稱呼）梁舜燕演戲，可惜呢個成為佢嘅遺作。」講到今次角色「榮聲隆」都是做大律師，他笑言是度身訂造，而首次跟演其囝囝的周柏豪合作，他大讚對方專業，私底下仲好啱傾，「我哋都係鍾意運動，成日傾籃球同網球。」至於首度跟苗可秀合作，他竟然粉絲上身，「我嗰個年代個個都鍾意睇李小龍，佢同李小龍成日合作，我見到佢好似見到偶像咁。」他又表示暫時未有打算續大律師牌，所以會多作演出，甚至跟趙雅芝和兒子黃愷傑合作，「我唔介意，我都未同個仔合作過，同埋太太一齊都冇問題，不過佢哋呢排忙內地工作，暫時未睇我《多功能》嘅演出。」