【頭條獨家】買聖誕禮物冧三條「仔」　岑潔儀13萬名錶贈老公

岑潔儀（Zoey）於12年下嫁馬來西亞富商Dixon Chin，婚後疊埋心水做幸福少奶奶，得閒約朋友High-tea行名店，又間中坐吓私人飛機周圍去，生活優哉游哉。至誕下大仔Damian和細仔Donnie，Zoey就變成「全能媽咪」照顧家中三條「仔」，而Dixon都好識做，早年已送車送樓慰妻！查實Zoey都好有情趣，日前趁老公出埠公幹，便湊埋剛放學的Damian去揀聖誕禮物，其間更睇中一隻13萬元的男裝Rolex，唔使問一定係送畀老公啦！採訪：李權威

自升呢兩子之母後，岑潔儀除照顧一對寶貝仔外，間中亦會做馬評、KOL賺吓私己錢，見老公Dixon工作辛苦，又經常買嘢𠱁自己，聖誕將至，當然也要為對方準備一份「重手」禮物啦！日前傍晚5點半，手挽粉紅色Chanel Tote Bag的Zoey，拖住大仔Damian到將軍澳PopCorn買禮物，頭戴畫家帽的她穿上黑色短褲襯長Boot，露出一雙纖幼大髀，性感得來又青春，十足未生過一樣！未知是否打算給老公驚喜呢？當日，兩母子先到Rolex專門店睇腕錶，甫坐定定，男店員即拎出一本Catalogue向她介紹今季錶款，未幾，Zoey便睇中於櫥窗展示緊的新款男裝錶，價值港幣133,600大元！

陪囝囝揀禮物放電
Zoey將6位數的名錶戴上手，左睇睇右試試，又叫埋囝囝幫吓眼，不過唔知係咪悶親Damian，冇耐已經開始坐唔定，家下乜都「阿仔大晒」的Zoey見狀，即放低手錶留待下次研究，並帶囝囝到附近Logon揀玩具，沿途經過商場的聖誕裝置，Damian仲開心到飛埋去叫媽咪揸機影相。

一入到精品店，童心未泯的Zoey一見到女仔嘢即指住叫囝囝睇，Damian梗係冇興趣，扯住媽咪去睇車車同超級英雄嘢啦，見到個型仔Marvel玩具，他即刻Show畀媽咪睇，殊不知Zoey掛住研究手上的Toy Story公仔！好在Zoey都察覺到囝囝扁扁嘴，最終買了一件Star War玩具給對方，見她畀錢時又揀多件大大份的禮物，估計也是送給細仔作聖誕禮物！臨返屋企前，這位「廿四孝媽咪」又帶Damian去遊戲中心放電，其間，兩母子玩氣墊球玩到勁High，囝囝仲緊張到爬上張枱，雙腳吊吊揈，超搞笑！