【頭條獨家】婚後極忙 新劇煞科即補償 陳山聰帶怕醜老婆撐枱腳

今年11月1日，43歲的陳山聰跟拍拖6年的40歲圈外女友Apple結婚，婚後唞咗幾日就要開工趕拍新劇《大步走》，由朝拍到晚，山聰話，「每一日都係收工喺張床先見到老婆，會趁休息多啲時間陪佢。」講就易，莫講話「造人」大計，新婚人夫連瞓都無乜時間。近日新劇終於煞科，同陳煒去完內地烏鎮商演嘅山聰即刻交人，帶老婆去「米芝蓮指南」推介嘅銅鑼灣西苑食飯，見到記者嘅山聰話:「啱啱返香港，同老婆撐枱腳。」陳生甜甜笑，但陳太就超怕羞，全程擰歪面避鏡頭，好搞笑。採訪:李權威、李維隆

明年1月舉行的《萬千星輝頒獎典禮2019》，視帝之爭相當激烈，除了《白色強人》拍檔郭晉安同馬國明，還有話題劇《金宵大廈》的陳山聰及《解決師》的王浩信等，唔少網民力推在《金宵大廈》中飾保安員「阿蕭」的山聰做視帝。對被網民推舉，山聰曾笑言：「唔係有冇信心問題，係仲未有資格攞獎，仲有好大好大進步空間，繼續努力啦。」

努力實行造人大計
結咗婚，劇集又有好成績，完全洗底的山聰好感恩，佢仲好想快啲做爸爸，仲話好恨生女。上月尾，山聰終於拍完劇，今年拍咗三套劇嘅山聰覺得體力透支，會放假休養身體，問到會否全力開工「造人」。陳山聰笑說：「樣樣都係，順其自然，做乜嘢都需要活力。結婚之後日日開工拍劇，每一日都係收工喺張床先見到老婆，會趁休息多啲時間陪佢。」他計劃明年與老婆到意大利的小島度蜜月。

陳太好怕羞避鏡頭
今個月尾，山聰又會同李施嬅、馬德鐘到美國登台，新年亦會再同陳煒到外地登台，努力搵真銀。剛同陳煒去完內地烏鎮商演嘅山聰一得閒即補償，拖老婆去銅鑼灣撐枱腳，據目擊食客透露，兩人食得唔多，但全是酒家馳名食品，如叉燒及花膠湯，又食又傾個幾鐘就埋單，陳太先步出，一見記者即返轉頭搵老公，其間見到老闆娘，兩公婆即寒暄數句，明顯係熟客。山聰見到記者有禮揮手，表示「啱啱返香港，同老婆出嚟撐枱腳。」陳太好怕羞，一直避鏡頭，就算入到電梯都一樣背住記者面壁，極之怕鏡頭。