吳浩康稱事業心重致分手　崔碧珈寸扮上進：大話精

吳浩康（Deep）今年4月被本報獨家爆撻着36G咪神崔碧珈（Anita），昨日出席活動時，Deep仍表示正計劃如何與女友共度聖誕，未料不足24小時，Anita深夜忽然於社交網貼圖，並有感而發：「從來都把感情看得很重，認為兩個人相處要互相包容，而不是要改變對方。如不，離開可能是一個新的開始。2020年，大家一齊加油！」又Hashtag「2020年新開始」，疑暗示手已分！

結果過了一個晚上，Deep今晨則於社交網出Po認分手，他寫道：「感恩和你一起的時間，我會好好珍惜亦有一件非常難忘的記憶，喺呢段時間裡面，可能我未能夠盡一個好男朋友的本份，因為我放了太多時間於工作而忽略了你，亦自知有不足，而不配為你的男朋友，我相信如果當我能有能力照顧好你之時，男人必需要有事業有能力，希望日後我有能力的時候，可以有緣和你再一起走，照顧好你，我衷心祝福你。」

Deep似是自責始終未能成為一個「理想男友」，仲希望更上一層樓後追回對方，不過Anita就似乎有啲不滿，先於Ig story Tag男方，並寸道：「扮上進，又講大話？」之後仲唔夠，更索性於Deep的發文下連環留言狙擊，她嬲爆說：「你想扮上進？」、「你幾時有放好多心機喺工作？」、「本末倒置」、「講得咁漂亮，多謝你繼續說謊，我哋之間從來唔係因為工作，我哋都同居一年，亦唔係能力」、「唔好感恩，大話精」、「睜開眼睛說謊」，睇嚟Anita真係好激氣！